Grok-ს ადამიანების სურათების რედაქტირება სრულად აეკრძალა

ილონ მასკი-ს კუთვნილმა ტექნოლოგიურმა კომპანიამ xAI-მ საკუთარი ხელოვნური ინტელექტის მოდელის — Grok — სურათების რედაქტირების ფუნქციონალი მნიშვნელოვნად შეზღუდა. ახალი წესების მიხედვით, მომხმარებლებს ადამიანების გამოსახულებებში ნებისმიერი ტიპის ცვლილების შეტანა აღარ შეუძლიათ.

შეზღუდვა გავრცელდა არა მხოლოდ უფასო მომხმარებლებზე, არამედ ფასიან გამომწერებზეც, რაც კომპანიის მხრიდან მკაცრ და უნივერსალურ ნაბიჯზე მიუთითებს. გადაწყვეტილება მას შემდეგ იქნა მიღებული, რაც Grok საერთაშორისო სკანდალის ცენტრში აღმოჩნდა — AI ასისტენტი მომხმარებელთა არალეგალურ მოთხოვნებს ასრულებდა, მათ შორის ქალების, მათ შორის არასრულწლოვანი გოგოების გამოსახულებების რედაქტირებასა და გაშიშვლებას.

სკანდალის შემდეგ Grok-ის წინააღმდეგ გამოძიება დაიწყო არაერთ ქვეყანაში, მათ შორის დიდი ბრიტანეთი, კანადა და იაპონია. აზიის რიგ ქვეყნებში — მათ შორის ფილიპინები, მალაიზია და ინდონეზია — AI ასისტენტზე წვდომა სრულად აიკრძალა, ხოლო შეზღუდვების დარღვევისთვის მკაცრი ფინანსური სანქციები დაწესდა.

გამოძიება მიმდინარეობს კალიფორნია-შიც — იმ შტატში, სადაც xAI არის რეგისტრირებული. შტატის პროკურატურა კომპანიას კანონმდებლობის დარღვევაში ადანაშაულებს და ამტკიცებს, რომ xAI-მ შეგნებულად დაუშვა ისეთი სურათების გენერირება, რომლებიც რეალურ სამყაროში არასრულწლოვანთა პროსტიტუციის ფორმად ჩაითვლებოდა.

კალიფორნიის გუბერნატორი, დემოკრატი გევინ ნიუსომი, აცხადებს, რომ საქმე სრულფასოვნად უნდა იქნას გამოძიებული და კომპანია, რომელმაც საკუთარ AI სისტემებს საკმარისი სამართლებრივი და ეთიკური ბარიერები არ დაუწესა, მკაცრი პასუხისმგებლობის წინაშე უნდა დადგეს.

კონტექსტი ნათელია: AI ინდუსტრია შედის ეტაპზე, სადაც „ინოვაცია ნებისმიერ ფასად“ აღარ მუშაობს — და xAI, როგორც ჩანს, ამას მძიმე ფასად აცნობიერებს.

სტატია მომზადებულია primenews.ge-ის მიერ.